كتب احمد على جعفر – شركة سامسونج – على صفحته الشخصية ( في بداية حياتي المهنية اشتغلت في الكول سنتر. سنتين كاملين والسماعة على ودني 😪
من أكتر الوظائف إرهاقاً وتعب وتحدي ممكن الواحد يمر بيها في حياته، و للأسف بتسيب أثر جسدي… خصوصاً على الودان!
بس الفترة دي اتعلمت فيها كتير، و أكتر درس عمره ما راح من بالي:
موظف خدمة العملاء مش صاحب قرار، هو مجرد ضحية و كبش فداء للشركة.
هو اللي دايماً بيحاسب على المشاريب:
لو في عيب في المنتج بيتلام.
لو سياسات الشركة مش منطقية بيتهاجم.
لو في تأخير في الصيانة هو اللي بيتقل منه.
لو جودة المنتج سيئة هو اللي بيتداس عليه.
عشان كده عمري ما عليت صوتي على موظف خدمة عملاء. لأني فاهم إنه في “وش المدفع” غصب عنه، ودي جزء من وظيفته.
نصيحة من القلب لل عنده قلب:
بلاش تثبت رجولتك و تفرح بصوت العالي علي واحد بيشوف شغله، وبلاش كلام يجرح و بلاش تِقل من بني آدم بيأكل عيش وبيعمل اللي عليه.

خدمة_العملاء