نورا أورخان وترشيحها لمجلس ادارة نادى الصيد ” شخصية مش مستنية شكر ولا مديح، ومش بتدور على الظهور”

كتب / محمد لُطيف عضو نادى الصيد عن نورا أورخان على صفحته الشخصية باحدى وسائل التواصل الاجتماعي

( عذراً البوست طويل شوية، لكن بجد كل كلمة فيه مهمة

السيدات والسادة أعضاء نادي الصيد المصري، أعضاء الجمعية العمومية،

أنا بتكلم معاكم النهاردة كعضو في نادي الصيد المصري وعضو في جمعيته العمومية، وقبل كل ده كواحد بيحب النادي ده جدًا؛ اتربيت فيه، وعشت فيه أجمل أيام طفولتي وشبابي، ومارست فيه رياضات مختلفة، واشتغلت في عدد من لجانه، وشاركت في فعاليات كتير، وعاصرت إدارات مختلفة على مدار السنين اللي فاتت.

من أول ما بدأت أشارك في شغل اللجان والأنشطة، وخصوصًا من انتخابات 2017، وأنا شايف قدامي شخصية بتحب نادي الصيد بجد، وبتحب كل حاجة بتعملها للنادي ولأعضائه، وبتدي كل اللي عندها في أي حاجة بتدخل فيها.

شخصية مش مستنية شكر ولا مديح، ومش بتدور على الظهور لمجرد الظهور، لكن اللي كان يهمها في الأول والآخر إنها تشوف نتيجة اللي بتعمله في صورة فرحة وسعادة على وشوش أعضاء النادي وأبنائه.

وشفت كمان شخصية، لما خاضت الانتخابات سنة 2017 وسنة 2021 وما حالفهاش التوفيق، ما اختفتش من المشهد، وما قالتش خلاص أنا عملت اللي عليا، ولا اعتبرت إن دورها انتهى عشان ما أخدتش مقعد في مجلس الإدارة

بالعكس خالص كملت شغلها، وساعدت الإدارات اللي جت بعد كده في تنظيم وتنفيذ الفعاليات والاحتفالات، وشاركت في أي مشروع اتطلب منها تشارك فيه، وما بخلتش بخبرتها أو استشاراتها أو علاقاتها اللي قدرت تستخدمها لخدمة النادي

وفي حاجة دايمًا باخد بالي منها كل ما أنزل النادي معاها.

كتير بنكون ماشيين في النادي، والحمد لله بنلاقي ناس بتستوقفها عشان تسلم عليها أو تتكلم معاها، وأوقات كمان يطلبوا منها تساعدهم في حاجة، رغم إنها وقتها ما كانتش بتشغل أي منصب في مجلس الإدارة

ومش الأعضاء بس.

كتير من العاملين والموظفين في النادي بيوقفوها يسلموا عليها، أو يدعوا لها، أو حتى يقولوا لها
: “انزلي الانتخابات تاني.”

والنوع ده من العلاقة ما بيتبنيش في يومين، ولا في كام شهر، ومش بتعمله صورة أو بوست

ده شيء أنا شفته بعيني على مدار سنين

وعشان كده، لما بدأت أسمع من أعضاء النادي نفس الكلام بيتكرر، وإنهم عايزين نورا تنزل الانتخابات الجاية، ما حسيتش إن الموضوع مجرد رغبة في إنها تترشح مرة تانية

أنا شفت فيه امتداد طبيعي لسنين من الشغل والعطاء

نورا أورخان مش نازلة الانتخابات عشان منصب أو شهرة أو عشان تثبت حاجة لحد او لتحقيق الذات .

هي الحمد لله حققت على المستوى المهني والعملي والمجتمعي حاجات كتير تخليها مش محتاجة منصب في نادي الصيد عشان تثبت نفسها.

عندها أكتر من 25 سنة خبرة في التسويق والاتصالات التسويقية والعلاقات العامة وبناء العلامات التجارية ووضع الاستراتيجيات، وحققت خلال مشوارها المهني نجاحات كبيرة خلت ليها اسم وخبرة في مجالها، وساهمت بخبرتها في تطوير الأماكن والشركات اللي اشتغلت فيها على مدار سنين طويلة.

وفي نفس الوقت، عمر نجاحها المهني ما كان سبب إنها تبعد عن العمل العام أو عن خدمة النادي والمجتمع.

ويمكن بعض أعضاء النادي ما يعرفوش كل اللي نورا قدمته للنادي، وده في جزء كبير منه لأنها عمرها ما كانت بتحب تظهر نفسها أو تتكلم عن اللي بتعمله باعتباره إنجاز شخصي لازم الناس تعرفه.

وعشان كده، اسمحوا لي أقول لكم بعض الحاجات اللي نورا عملتها خلال سنين شغلها داخل النادي، وكمان جزء من خبرتها ومشوارها المهني والمجتمعي.

نورا أورخان ونادي الصيد

نورا أورخان واحدة من أبناء نادي الصيد اللي ارتبطوا بالنادي سنين طويلة، مش بس كعضوة، لكن كواحدة شاركت واشتغلت وقدمت وقت ومجهود للنادي.

نورا عندها أكتر من 13 سنة من الخدمة والعمل التطوعي داخل النادي، وكانت عضوة في لجنة التسويق من 2013 إلى 2017، وبعدها تولت منصب مقررة لجنة العلاقات العامة من 2017 إلى 2021.

وخلال السنين دي، شاركت في تنظيم وإدارة فعاليات واحتفالات كتير، وكان دايمًا هدفها إن نادي الصيد يظهر بالشكل اللي يليق باسمه وتاريخه، وفي نفس الوقت تحاول قدر الإمكان إنها ما تحملش خزينة النادي أعباء إضافية، وتشتغل على جذب موارد وفرص وشراكات للنادي.

ومن الحاجات اللي شاركت في تنظيمها:

• تنظيم تكريم أبطال الجمهورية للسباحة سنة 2014، وكانت صاحبة فكرة تكريم أولياء الأمور تقديرًا لدورهم كجنود مجهولين ورا نجاح أبنائهم الأبطال.
• تنظيم البطولة الأفريقية للسيدات في دورتها السابعة عشرة سنة 2016، واللي اتعملت على أرض نادي الصيد، وحصل النادي بعدها على خطاب شكر من اتحاد كرة السلة على حسن التنظيم.
• تنظيم تكريم أبطال الجمهورية من أبناء نادي الصيد على مدار سنتين.
• تنظيم احتفالية تكريم البطلة الأولمبية هداية ملاك.
• تنظيم احتفالية أبطال حرب أكتوبر من أبناء نادي الصيد سنة 2019.
• تنظيم احتفالية عيد الشرطة والشهداء سنة 2020.
• تنظيم وإدارة احتفالات رأس السنة بفرعي الدقي وأكتوبر في أعوام 2018 و2019 و2020، بالتعاون مع لجان الشباب والأغذية والمشروبات ولجنة المبنى الاجتماعي وإدارة فرع أكتوبر.
• تنظيم ملتقى توظيفي بالتعاون مع شركة شغلني، لخدمة شباب وأبناء النادي.
• تنظيم احتفالات وتكريم أمهات نادي الصيد في عيد الأم على مدار 3 سنين.
• بالإضافة لفعاليات كتير اجتماعية ورياضية وفعاليات للرواد والمرأة وأعضاء النادي.

ودي طبعًا مش كل حاجة نورا شاركت فيها خلال سنين شغلها داخل النادي، دي مجرد أمثلة من الحاجات اللي أقدر أذكرها النهاردة، وفي تفاصيل وفعاليات كتير ممكن عدد كبير من أعضاء الجمعية العمومية ما يعرفوش عنها حاجة.

نورا والعمل المجتمعي

ودور نورا مش مقتصر على نادي الصيد بس.

هي كمان عضوة في نادي روتاري، وتولت رئاسة أحد أندية الروتاري، وليها سنين طويلة من العمل المجتمعي والتطوعي والمشاركة في مبادرات وأنشطة هدفها خدمة المجتمع.

نورا والخبرة المهنية

أما على المستوى المهني، فعندها أكتر من 25 سنة خبرة في مجالات التسويق والاتصالات التسويقية والعلاقات العامة وبناء العلامات التجارية ووضع الاستراتيجيات.

اشتغلت لسنين كمدير تسويق في عدد من كبرى شركات التكنولوجيا المالية والقطاع المصرفي، وكمان اشتغلت في مجال الإعلام والتقديم، وده اداها خبرة كبيرة في التواصل والإعلام والعلاقات العامة.

وحاليًا هي شريك مؤسس ومدير تنفيذي لشركة DoLab Marcom المتخصصة في التسويق والعلاقات العامة وتنظيم الفعاليات والمؤتمرات، وكمان شريك مؤسس ومدير في شركة Le Coin لإدارة المحلات التجارية والمطاعم والفنادق.

وهي كمان صاحبة ومؤسسة “كل حاجتي”، أول منصة متكاملة للمرأة، واللي هدفها تقديم محتوى وخدمات وحلول تلبي احتياجات المرأة في مراحل مختلفة من حياتها، وده مشروع بيعكس جانب تاني من خبرتها واهتمامها بالمرأة وتمكينها.

وأنا شايف إن كل الخبرات دي ممكن تكون إضافة حقيقية لنادي الصيد، خصوصًا في حاجات زي التسويق، وإدارة العلاقات، والتواصل، وتنظيم الفعاليات، وبناء الشراكات، وجذب الفرص والموارد.

نورا خريجة مدرسة سان فان سان دي بول الفرنسية، وكلية التجارة قسم اللغة الإنجليزية – جامعة القاهرة.

لكن بالنسبة لي شخصيًا، أكتر حاجة بتميز نورا مش عدد سنين الخبرة، ولا المناصب اللي شغلتها، ولا النجاحات اللي حققتها في حياتها المهنية.

الأهم عندي إنها عمرها ما كانت بعيدة عن العمل التطوعي وخدمة الناس.

سواء داخل نادي الصيد، أو من خلال العمل المجتمعي، أو حتى في حياتها اليومية، كانت دايمًا شايفة إن الخبرة مالهاش قيمة لو مش هنستخدمها عشان نساعد بيها غيرنا.

وبالنسبة لها، نادي الصيد مش مجرد مكان بنقضي فيه وقت.

نادي الصيد بيت له تاريخ، وأعضاء، وأبطال، وأجيال. والانتماء ليه معناه إن كل واحد فينا يكون له دور حقيقي في الحفاظ عليه والمساهمة في تطويره.

وعشان كده، ومن موقعي كعضو في نادي الصيد وعضو في الجمعية العمومية، ومش بس بصفتي الزوج اللي بيحب ويدعم زوجته، لكن كمان بصفتي واحد عاشر نورا عن قرب، وشاف بعينه اللي قدمته على مدار سنين، وشاف هي بتحاول تقدم إيه للنادي ولأعضائه،
أنا أعلن دعمي ليها في خوض انتخابات مجلس إدارة نادي الصيد القادمة.

وأتمنى من كل واحد يعرف نورا، وكل واحد اتعامل معاها أو شاف جزء من تجربتها داخل النادي، إنه يمنحها دعمه وثقته، ويشجعها إنها تخوض الانتخابات الجاية.

وأتمنى بجد أشوفها ضمن أعضاء مجلس إدارة نادي الصيد القادم.

كل التوفيق لنورا أورخان.

محمد لُطيف
عضو نادي الصيد المصري